جدو يا رمسيس

جدو يا رمسيس

لسه سؤالى جوه منى تعيس..

أكيد و انت رايح مقرك الجديد

كنت بتهرب يا جدو من السكة الحديد..

عشان حديدها كفن..عشان شريطها حضن

أشلاء ولادك و دمهم سايح..

شفت الفضايح؟ فين انت رايح؟

للهرم؟ اللى ما شفته و انا اللى عمرى عقود؟

حق شوفته للى بس يعبر له الحدود ..

أما أحفاد البناة ملهمش غير ممنوع= مطرود

جت على دى؟ما هو فى العالم كله مبقالهمش وجود..

***

جدو يا رمسيس

شفت أطنان البشر حولك بتضحك فى بلاهة؟

خارجين كما اللى نادتهم النداهة!

اللى خرج جابه حنينه للحجر اللى انتشر فى خلايا دمه

و انتصر على نخوته..

على انتماءه لأمته..

ساب أهله يتقتلوا و خارج ينظرك..

مش برضو عنده حق؟دانت كنت عظيم أوى.. ما أكبرك!

بتقوللى ايه؟ يا صدمتى و صدمتك!

اللى خرج مش كل غرضه رؤيتك؟

خرج عشان تطوله شاشة ماللى بتنقل زفتك؟

شفت الهيافة؟ مش ليا حق بذمتك؟

تعرف يا جدو،

الموسيقى اللى مصاحبة نقلتك مش من عمل ولادك-إنما مستوردة..

و الأجهزة اللى حاضنة جثتك مستوردة..

حتى أفكارنا ..مش من عقولنا مولدة..مستوردة...

***

تعرف يا جدو؟

احتفالك الوحيد اللى جه من كام سنين..

عشنا جيل من بعد جيل نستنى فرحة كبيرة زى فرحتك..

تمثال حجر لكن ماشفت فى رقتك..

قلبك بياكلك عالهرم-اللى بتاكله عوامل التعرية- و برضو شوقه لطلتك..

بتفتته -بدال الذرة ألف-محبتك

***

نقلوك يا جدو بلا ذنوب..

نقلك يا جدو تعسفى..

7 الآف سنة مبتلى و مش مكتفى؟

مش كنت مالأول تقدم استقالتك

قبل ما- زى اللى قالوا الحق فى بلدنا- تتنفى؟

طب ليه نفوك و انتا حجر و بلوتك انك مشاهد؟

يمكن عشان عاللى بيحصل شاهد؟؟

***

ما تخافش يا جدى فى يوم من وحدتك..

عادة ولادك انهم ..

مطرح ما يرسى اللى مالك أمرهم يرسوا معاه..

يعنى ميدان رمسيس هيتنقل الهرم..

و أكيد أكيد هينقلوا السكة الحديد وراه!!

25/8/2006
مع نقل التمثال