Monday, July 2, 2007

لبنان


هاستحمل الضرب فلبنان و الا الأحزان


اللى نازلة مرة واحدة عليا؟؟


تسحب مظاهر الحياة اللى ساكنة فيا


خلية ورا منها الخلية تنتحر...


***


نازلة الأحزان ورا أحزان.. مش كافى الضرب فلبنان؟


لأ و كمان تتراكم أحزانى الداخلية!!


***


ليه النهار قلب ضلام؟؟


أنا فين ؟؟فوسط كوم ركام؟؟


السما إزاى مالتراب اللى أشلاء سابحة فيه بدل السحاب؟


من ثوانى فاتوا كنت بسمع أصوات كتير..


صوت النذير جاى من بعيد. صفير و دوشة.. صراخ و هدم ..


وزلزلة و هوا ملاه الدم..


دلوقتى ليه ودانى-مهما تحاول- متطولشى غير الصمت؟


الجواب انى اندفنت..


مش مهم انا لسه عايش و الا مت!!


***


مالنهارده مفيش سفير عشانى راح يقدم استقالته..


مالنهارده مفيش رئيس حيبعت لى قوافل الإغاثة أو فمرة بالحقيقة يشق صمته...


مالنهارده مفيش يا أمه حد فيكى راح يناضل لجل ما يعلن لى شجبه و اعتراضه..


و لا مواطن عربى راح تفلت منه آهاته


لما يشوف صورتى جريح


أما و أنا تحت الضريح بس هيمصمص شفاته

يمسك ريموت و يقلب فى بقية قنواته!


يحمد المولى على ان النهارده قطر الموت عدى و فاته!!


***


لبنان يا حتة من وطنى و عمرى ماشفتها


إزاى و ليه يوجعنى الضرب فيكى؟


الضرب متركز عليكى انما


إزاى بينتشر الألم مع الهوا


و أبكى و تبكى كل دى الأمة عليكى؟؟!!




(اهداء إلى روح أبونا الشيخ إمام فى عيد ميلاده النهارده)

5 comments:

انحلت سيور العربه وسقط المهر من الاعياء said...

لبنان يا حتة من وطنى و عمرى ماشفتها
إزاى و ليه يوجعنى الضرب فيكى؟
الضرب متركز عليكى انما [Photo]
إزاى بينتشر الألم مع الهوا
و أبكى و تبكى كل دى الأمة عليكى؟؟

انحلت سيور العربه وسقط المهر من الاعياء said...

روعه بكل ما تحمله الكلمه من معنى

تحيا تى

اسكندراني في الغربة said...

المفروض اقول جميل روعة ممتاز
بس انا عندي مشكلة مبحبش الشعر او النثر المقروء
مبعرفش استمتع بية
مثلا عبد الرحمن الابنودي يسمع ولا يقرأ
بس في حل مش عرف ينفع معاكي ولا لأ
اية رأيك لو سجلتي اعمالك بصوتك و تحطيها مع البوست
و يبقا مقروء و مسموع
و يمكن تضرب معاكي و تعملي شرايط
و تبقي مشهورة و معندكيش وقت للمدونة
ربنا يستر

Unknown said...

اسكندرانى:
الحاجات دى مفهاش مفروض خالص
و الله الفكرة جامدة و بفكر أعملها أول ما افضى
بس برضو ممكن تقول رأيك فى الفكرة أو الكلام قبل ما تسمعها
استنى الشريط قريبن بالاسواك:)

فتاة عشوائية said...

نازلة الأحزان ورا أحزان.. مش كافى الضرب فلبنان؟



لأ و كمان تتراكم أحزانى الداخلية!!


----------------------------
عاجبنى أوى إنك ما وقعتيش فى غلطة المثالية المبالغ فيها واللى عادة بتكون إدعاءإن بنى أدم عنده مشكلة خاصة هتختفى فى وجود الهم العام .

إحساس يخليك وإنت بتقرأ محتار
هل هموم الشخص ده فى الخلفية ولا الهم العام هو الخلفية لحياته
وديه حاجة أنا بسميها إنسانية النص