ضربوا القمر بالمدفع الرشاش

ضربوا القمر بالمدفع الرشاش

نزل المطر عالورد الاحمر باش

حرقت نيران مؤذية كل مكان

و عيالنا تاهوا من ورا الدخان

وقفوا الصبية و الصبى ساكتين..خدت النيران منهم أغانى زمان

***

نسمة ليالى الصيف شعاع ذرى

قطعت طريقى الجوى و البرى

و البحر كان مرجان بين دما و دموع

كتب التاريخ و بكره هيقرى

***

رسالة من بغداد إلى قانا

بنت العرب انسانه غلبانة

قالوا السلام سلمنا قتلونا

منعونى آخد حقى و عزانا

***

يا حلق أخرس و الضماير طرش..طرش

يا حق نايم من زمان عالبورش

يا قلبى متسلمش و لو دبحوك

و أى شئ غير الوطن متقولش

ضربوا القمر بالمدفع الرشاش

أشعار أحمد حداد حفيد العملاقين فؤاد حداد و صلاح جاهين

و لحن شادى مؤنس و غناء اسكندريلا