Wednesday, June 6, 2007

عن الإخراج البلوجى و القسطرة و ما إلى ذلك...

البلوجات حلوة و كل حاجة باعتبارها منفس لصوتك و حاجات تانية زى ما كلنا غنينا فى الحمام فى مرحلة من حيواتنا
لكن من ناحية تانية اليومين دول حسيت إن البلوجات دى عاملة زى قسطرة البول اللى الناس العيانة بتركبها ربنا يصبرهم
البلوج بتجمع إبداعك و تسحبه بانتظام قد يصل لأن يكون أقل من يومى بالضبط زى ما القسطرة تجمع البول من الدم و تتخلص منه عشان لو اتكتم جوانا ممكن يسممنا
يا ترى هل ده يسمح للإبداع التراكمى بالتواجد جنبا لجنب مع عملية الإخراج البلوجى اللى أصبحت أكثر ضرورة من بعض عمليات الإخراج البيولوجية لأنها تهتم بتوفير إمكانية استمار الحياة الروحية للكيان الملخبط المسمى بالبنى آدم و الا ده بيسحب من رصيدك؟
انت رأيك ايه؟

5 comments:

Unknown said...

و يا تري تعريف الأحتباس البلوجي أيه ..
حيجي يوم و أحررك من النظريات البيولوجية اللي خنقتينا بيها دي ...
مشكلتك بغض النظر عن أنك بنتي"انا أمها يا جماعة" و أمورة و كميله"هى هى" إلا ان البيولوجيا و الفيزوزيا لحست مخك
ودمتم سالمين

Unknown said...

تحررينى ايه هو الجو ناقص؟
امهات الزمن اللى قبل الآخرانى شمال

محمد مصطفى said...

شوفي يا بنتي برغم حاجات كتيييييييييير جدا إلا انك ساعات بتقول كلام مهم
كنت اتناقشت في مرة ع القهوة مع محمد كمال و ابراهيم عادل و مصطفى الحسيني و حبة فنانين ماعرفهمش المهم يعني عن ده هل التدوين بيأثر بالسلب على المبدع و لا لأ
و المبدع المدون ده يكتب ايه في المدونة يعني اعمال ادبية و لا يهيس و ازاي يتواصل فيها
أنا مقتنع ان التدوين سلاح ذو حدين للمبدع هو نافذه جديدة للتواصل لكنه ممكن يهدم المبدع زي مانتي قلتي بان التدوين هيخرج كل شحناته الداخلية فهيبقى فاضي من جوه هوا
فتكون محصلته التراكمية صفر
لكن مش معنى ده ان المبدع ما يجونش لكن معناه انه يلاقي شكل تدويني يكفل ليه عدم الاحتراق و الفضاء الداخلي
حلو البقين الاخرانيين دول
اي خدعه

Masry said...

و ليه نعتبر ان البلوج اصلا عملية قسطرة و معتبروش عمليه الاخراج نفسها و لكن بصورة غير صحيحه ..
لان معظم البلوجين لا يدركون عملية الاخراج الصحيحة لعدم وجود الخيرة الكافية في الحياة ... فبيحصل عملية اخراج عن جهل و اضطرارية و من هنا نشات المشكلة اللي بيشوفها ناس اكثر خبرة زي سيادتك او ناس عندهم علم بطرق الاخراج الصحيحة ..
و ممكن نعتبر ان التدوين كمان فشل في اخراج تلق الطاقات بصورة مباشرة.. يعني في معظم الاحيان يفشل مدون الرأي في دخول مناقشة عن الموضوع الي كاتب عنة و الخروج بفايدة او من غير منوصل لسدود و دة يرجع لاسباب نفسية داخليه في معظم الاحيان .ز اصلا محتاجة وقت طويل تتناقش فية
خلتينا نشغل دمغنا علي الصبح و ضاعت دماغ النوم اللي كنت عاملها
تحياتي :)

Unknown said...

مادو:
ايه الكلام ده حفظته امتى؟

آخر:
رأيك جدير بالاحترام، المصيبة ان الناس دماغها بقت شغالة حتى و هما نايمين!