فى عربة السيدات

المترو وسيلة سريعة للوصول ..

بالرغم من كل هذه الكتل التى تحتل جميع الفراغات الممكنة ، و الأنفاس التى تخرج من فم الذى بجانبك لتدخل أنفك فيما يشبه إعادة التدوير..

قد تتحمل كل ما سبق، لكنك لن تتحمل ذلك الإعلان المعلق الذى يؤكد لك فى إصرار أنك "مش لوحدك..على الأقل فى اتنين بيبصوا على الاعلان ده معاك..حاول تلاقيهم.

خليك أكثر فضول..خليك أكتر نوكيا"

بغض النظر عن العلاقة صدقته لثوان بحثت فيها عن الفضوليين عداى،من بداية عربة السيدات الأولى و حتى نهايتها لم أجد ..

لن تتحمل هذا الشعور إذ لم تتخيل يوماً أن الوحدة قد تصل بك حتى هذا الحد..

***

وصلنا بالبلادة إن الحياة تبقى مجرد عادة..

عادة مجردة من كل طعم..

حالة مفروضة علينا متستاهلشى نوصفها بإسم...

مش مهم ليل بيهجم أو نهار يطل..

باقى ساعات اليوم مكملينها نوم رغم إننا من السرير بنقوم!!

كل واحد مننا عايش و بس لأنه يالعيش عليه محكوم!!

الحياة حركات آلية !

تمثيلية

***

عندى أحزان كتير

معرفشى تكفى الكون والا لأ

لكنها تكفينى

و أنا وحدى..

متبعترة

و مفيش خيوط ألمها و تلمنى..

و كل حاجة حولى محبطة

مش سايبة مطرح للنفس..