الحر

حاجة تقرف

الموجودات- سخنة و باردة- تلسعك

في نهار الصيف الكئيب

وشوش تزود الاكتئاب..

الأكل لازمه مجهود كبير

و المعدة مفهاش سنتي تانى

يتملى مالشرب..

عرق و تلزيق

و ريق ناشف و سدة نفس..

* * *

توهان ...

* * *

باجري ألعب عالكمبيوتر

ضفدعة بتتف كِوَر

و اللي شبه بعضها تخبط فبعض و تختفي..

عقلي يخلى اللعبة خلفية

لميت فكرة بيتخانقوا

و لا واحدة تخرج..

(ليه الكلام ده مبيحصلش ويًّا البشر؟)

* * *

انزل لشغلي

راكبة تاكسي

شفت تاكسي قبل منه

استغربت ليه مخبطوش في بعض و اختفوا؟

* * *

نفسي نفسى تروح لحاجة..

أكلة أو حتى خروجه..

حد أشوفه

لكن مفيش..

سايبة الوجود يتكوم على بعضه بره مني..

(عايشه دور فِلَّة سادَّة بانيو بيتملى ميَّه)

* * *

الحل هو اسكندرية

بشوارع بطعم القهوة

و ليل بطعم الشروق

و هوا بريحة الملح و الروح الخفيفة

و بحر متغطسة ُبه هموم تكفى 500 كون

و تى شيرت كاتّ

و مايوه و جيبة قصيرة

و شعر مبلول ميَّه مالحة

(مش ب جيل)..

يا اسكندريتي

حاولوا يخلوكي مدينة قاهرة و لا قدروش

حاولوا يخلوا القاهرة زيك و لا عرفوش

و ايش يعملوه اللى فيكى متولدوش

غير يندبوا حظهم و يستنوا المصايف؟

* * *

(عودة لأرض الواقع)

الموجودات تقرف

و الصوت تقيل على جلدى

بيحرقه مع العرق..

حتى القعاد من غير هدوم مش نافع..

يا ترى الجلود لو تتقلع كانت هتفرق؟