اوتوبيس

الحياة أوتوبيس كبير..تركبه؟

ده قرار خطير..ياخده ليك ناس غصب عنك..

تندفع بره مكنك يقطع الحبل اللى وصلك باللى جابك إيد خبير..

يقطع التذاكر كمسارى حكومى و تطلع ناس كتير..

ناس بتتحسس طريقها وسط أجسام الزحام..

الهوا بريحة العرق..ويا الغازات ويا تقليد برفانات..

وسط الشتايم و المديح وكلمة الغزل القبيح..

خليط مقزز لازم تشمه.. و النتيجة اختناقك ويا نقص الأكسجين..

و لو وقعت مترحمكش خطاوى ناس مستعجلين..و الا إيدين النشالين و الدعبسة عاللى تطوله ..

(حتى المشاعر و الأفكار لو ما فيش فى جيبك حاجة أغلى أو أهم..)

من أوراقى القديمة..

روحى احتاجتلك..
روحى بتلازمك زى الدوا او اللمون فى نزلة برد جتلك..

و برغم كل ده احتاجتلك
و لما جيتلك
انشغلت عنى بناس كتير
مع انى عمرى معرفت حد قبلك
غير ناس كتير برضو
و الناس دى كانوا يروحوا و يردوا ..بس انت ثابت
و الناس دى كانوا بياخدوا و بيدوا...و فضلت ساكت
حاولت اعرف انت عايز منى ايه
جالى عريس لما زهقت وافقت انى اقابله بره
مع انى من لحظة ما شفتك
لحد دلوقتى و انا رافضة
!اقابلك حتى مرة

جواب للسما

"عيد ميلاد سعيد يا بويا"

جواب كتبته للسما..وياريته يوصل

وبعد ما عدت سنين.. مش قادرة أوصل ..

إيه اللى حصل؟

لكنى تايهة..

منين أجيب لفوق طوابع؟

مش لاقية مكتب البريد

و الألم عمال يزيد

يا ترى وصل؟

من يوم طلوعك للسما..مات الأمان

بانوا الديابة و اتقفلت ياما البيبان

و الناس بتفتى:"هتنسى كل ما وقت فات"

و أنا نفسى أسأل مرة و يردوا"مين اللى مات؟"